قرائي الاعزاء ،

هذه صفحة جديدة في مدونتى اضيفها ، لكنها اليوم للصغار فقط ، فهى نتاج تجربتى الفريدة مع طفلتى الوحيدة مريم التى اتمنى من الله ان تقر بها عينى ..

ومريم في عمر الزهور اربع سنوات لكنها اكسبتنى خبرات عظيمة ومشاعر نبيلة قل ما نجدها بين الكبار وقد منحتنى سعادة ما بعدها سعادة واعطتنى القدرة على سرد الحكايات ومن خلالها ابتكرت يوميات كروكو العجيب التى تستيقظ بها مريم كل يوم حتى نذهب الى الحضانة فهي زادها الصباحي لانها تمتعنى وانا احكي وهي تسعد لانها تسمع ما تحبه في كل صباح حتى تنهض من فراشها في نشاط وحيوية وحب ..

لذا اقدم لكم يومياتنا الصباحية واشرككم معنا فيها

ولنبداً على بركة الله

يوميات كروكو العجيب ( عايز أكبر)

كان يا ما كان في سالف الزمان وفي نفس المكان هنا على ارضنا الواسعة ، كان بيعيش كروكودايل يعنى (تمساح) وسط الشجر والخضرة والطبيعة الجميلة ، كان بيحب الحياة والحياة كانت بتحبه ، يصحى من النوم على بكرة اللي جاي وقلبه كله امل ونشاط في دنيا جديدة مليانة افراح ونجاح ..

وف يوم من ذات الايام ماما كانت بتصحي كروكو علشان يروح المدرسة وسألها امتى يا ماما ح اكبر وابقى زيك وزي بابا ؟؟ ، ضحكت ماما وحضنت كروكو جامد قوى وقالت له سؤال وجيه يا كروكو !  ضحك كروكو ضحكة عالية وقالها يا ماما حسبي فطستينى ، ضحكت ماما هيه كمان وقالت له يا كروركو كل شيء باوان الشجرة الكبيرة قبل ما تبقى زي ما انت شايفها كانت بذرة صغيرة وحباية في بطن الارض نزلت عليها المطرة راويتها فضلت تكبر وتكبر وتفرع لحد ما بقت شجرة كبيرة قوى زي ما انت شايف بتضلل علينا وقت الحر ، وفروعها بتحمينا وقت المطر والبرد ، ضحك كروركو تانى وقالها وانا يا ماما نفسي اكبر وابقى زي الشجرة دي قالت له ان شاء الله يا كروكو ح تكبر وتفرح  واكيد  ح تبقى مفيد لكل اللي حواليك لانك بتحبهم ، زي الشجرة بالظبط ..

يلاه بينا بقى علشان نلحق المدرسة ونبقى نكمل بكرة ان شاء الله