(بحب ماما )

النهاردة كروكو صاحي مزاجه عال العال ، قام من سريره وجرى على الحمام ، غسل وشه و نشفه زي كل يوم  ودخل جرى على اوضته عشان يكمل لبس ، ماما استغربت قوى لانها دائماً بتقعد تصحي كروكو كل يوم وقت طويل . يا ترى ايه السبب يا كروكو في هذا النشاط ؟

دي ماما بتسأل نفسها وبتفكر ؟؟

الظاهر ان كروكو اخد باله من ماما وهيه مشغولة بيه فضحك كالعادة وقال لها اصل يا ماماانا بحبك قوى ، انتِ كمان بتحبينى ؟، ماما استغربت لسؤال كروكو وقالت له طبعاً انا بحبك أكتر من نفسي بس ليه السؤال ده ؟ قالها اصلي حلمت بالقطة الشقية اللي كانت بتجرى ورا الكتكوت الصغنن وعايزة تاكله ، وهوا جرى منها لما كان ماشي لواحده من غير مامته لانه ساب ايديها في الشارع فلما شافته القطة الشقية حبت تاكله هم هم لكنه خاف وجرى بعيد عنها وهيه ما عرفتش تمسكه ، وفجأة ظهرت ماما وحضنته بين جناحتها و نقرت القطة الشقية في راسها

وقالت لها اوعى تيجي جنب كتكوتى الصغنن تانى ، فانا فرحت وصحيت احكي لك اللي حصل ..

ابتسمت ماما وقالت له حلو قوى الحلم ده يا كروكو بس لازم نتعلم حاجة اننا نسمع كلام ماما ونمسك ايديها واحنا ماشيين في الطريق علشان ما نقابلش القطة الشقية اللي ممكن تضايقنا او تأذينا وطبعا لان ماما بتحب ابنها الكتكوت الصغنن دافعت عنه وبعدت عنه القطة الشقية ، كروكو فرح جداً بكلام ماما وقال لها انا مش ح اسيب ايديك ابداً واحنا ماشيين في الشارع ، انا متأكد ياماما انك بتحبينى وانا كمان باحبك ، واداها بوسه كبيرة على خد ماما وقال لها

يلاه بينا بقى علشان نلحق المدرسة ونبقى نكمل بكرة ان شاء الله .. J