(وعد الحر دين عليه )

النهاردة يوم الجمعة يعنى يوم اجازة كروكو من المدرسة وماما كانت وعدت كروركو انها تاخده ،  في رحلة الي جنينة الحيوانات ، وصحي كروكو بدري جداً لانه عارف انه خارج يتفسح وسال ماما ها يا مامتى ح تروح جنينة الحيوانات؟؟

 قالت له طبعاً يا كروكو بس بشرط تسمع كلامي وتشرب اللبن بتاعك قوام وبعدين ننزل على الجنينة على طول ..

كروكو ما كدبش خبر وجري على كوباية اللبن وشربها كلها مرة واحدة وهوا سعيد انه سمع كلام ماما وهيه اكيد ح تحقق حلمه في انه يروح جنينة الحيوانات ، ماما كانت بتراقب كروركو من بعيد وبتبتسم كالعادة.

 واول ما خلص قالها اتفضلي يا مامتى يلاه بينا على الجنينة ، ماما قالت له لسة فاضل حاجة كمان  لازم تعملها يا كروكو انت ما اكلتش السندوتش ، كروكو بص لماما كأنه بيقول لها اوعي يا ماما ترجعى في كلامك ، ماما فهمت من كروكو هوا يقصد ايه ومسكت ايديه في حنان .

 وقالت له فاكر يا كروكو الحدوتة بتاعة الاسد أسود ملك الغابة اللي وقع في الحفرة بتاعة الصياد ، قالها ايوة ياماما احكيهالي تااانى وقعد يدبدب برجليه يدبدب برجلية راحت ماما ضحكة ضحكة كبيرة وخادته في حضنها ، وقالت له بس كدة ح نتأخر على الرحلة ، قال لها لا ياماما احكيها بسرعة !

ماما قالت له حاضر يا كروكي ، كان ياما كان يا سعد يا اكرام وما يحلى الكلام اللا بذكر النبي عليه الصلاة والسلام ، كان فيه زمان زمان ملك في الغابة اسمه الاسد (أسود) كان جبار وكل الحيوانات بتخاف منه وبتترعب اول ما تشوفه.

في يوم وهوا ماشي عمال  يزعق بصوته الرهيب ويقول انا الاسد اسود ملك الغابة وكل الحدود مين يقدر عليه بين الحيوانات في هذا الوجود ، وهوا بيزعق ، فجأة وقع في حفرة كان عملها الصياد وحط عليها شبكة كبيرة قوى وغطاها بالاشجار ، الاسد قعد يصرخ مين عمل كدة ؟؟ مين اللي حفر الحفرة دي في مملكتى ؟؟

 الحيوانات سمعت صراخ الاسد اتجمعت كلها حوالية وراحوا يتفرجوا عليه وهو محبوس في الحفرة وعليه شبكة الصياد ، وكان بينهم الارنب أرنوب والبطة بطوطة والزرافة زروفة والغزالة غزولة حتى العصافير الجميلة وقفت تتفرج من بعيد على ملك الغابة ، وكان الفار فرفور معاهم كمان ، بس حصلت حاجة غريبة ، نط الفار فرفور بين اصاحبه اللي بيتفروجوا على الاسد وهوا محبوس في الشبكة ، ووقف قدام الاسد من غير خوف ، ونادي عليه وقاله يا اسد يا اسود يا ملك الغابة ايه رايك في اللي يطلعك من الشبكة تعمل له ايه ؟؟ الاسد بص كدة وقال له له مكافأة كبيرة جداً رد فرفور وقاله ولو كان الفار فرفور ح تعمله ايه ،، قاله بقى انت يافار يا فرفور ياللي شكلك صغيور ح تخرجنى من الشبكة ؟؟ انت بتتريق عليه ؟؟ الفار قاله ابداً حتى اوعدنى وشوف انا ح اعمل ايه !! الاسد فكر شوية وبعدين قال له اوعدك بايه يا فار يا فرفور يا حتة صغيور ، قاله توعدنى انك ما تاكلش اصحابي ولا تأذيهم ابداً ابداً قاله طيب واكل ايه قاله مش لازم تاكل صحابي اوعدنى وانا ح اقطع لك الشبكة خالص خالص ..

الاسد قاله حاضر يا سيدى اوعدك ،، جري الفار فرفور على الشبكة وقعد يقرضها يقرضها لحد ما خلص عليها خالص ، وطلع الاسد من الحفرة ، وزعق بصوته خوف كل الحيوانات واترعبت جامد ، راح الاسد بص للفار فرفور ، وقاله انت يافار يا فرفور طلعت شطور وانا ح اديك مكافأة كبيرة ، واول حاجة ح اوصلك بيتك اطلع فوق ظهري عشان الوقت اتأخر ، الفار فرفور قاله موافق طيب ووعدك بانك مش ح تاكل صحابي قاله انا وعدتك ولازم تعرف ان وعد الحر دين عليه حتى لو ح يكلفه ايه !! مش كدة يا فرفور يا اللي لسة صغيور بس شطور .

ضحك كروكو وادى  ماما بوسة كبيرة وقالها طيب يا اسد  ياسود قصدى يا مامتى يا حبيبتى بينا بقى على الجنينة قبل ما الدنيا تضلم علينا .. JJ