الاسم: منال درويش 
ليه جوايا زرعت الأه
وبنيت سد ما بيني وبينك ،
حفرت لحلمك قبر ،،
دفنت سنينك!!
في حشايا راعيتك وأنت جنيني
ورويتك من شراييني
وحلفت بروحي لاخد بيدك
وسط التوهة ووسط العتمة
لجل ما تبقي نبتة عافية
لجلن ما أتباهى بيك
ف الروحة أو ف الجاية
نفتح شبابيكنا علي بكرة الجاي
ونلملم م السكة أحلامنا الضيعة ..
نلقي الضي فارد جنحاته
ينور حلمي وحلمك شمعة
لجلن ما يطير بينا لفوق،
وسط العتمة
لجل ما نطرح
منها شروق تجف على ايديه الدمعة
..ليه …؟
ليه تقطع ف القلب وريدي
وأنا دمي بيجري ف شرايينك
وأنا يوم ما زرعتك كان يوم عيدي
يوم ما نادتني وقلت يا أمي
صاين عرضك عمري ما أخون
طالب ودك مهما يكون
و أنا تاج الفل علي جبينك
وازاي راح أهون؟؟؟؟!!!
ليه جوايا حفرت الاه ؟!
يا حلم وضاع وأنا باستناه
ليه تصبح موجة عتية
و تغدر بيه ؟!
ليه تقتل ف القلب الحنية
وأنت عار فني صخرة عافية
مهما تكون الموجة ومهما تكون النوة
بازداد قوة وبازعق زي الريح
تتكسر تحت إقدامي جريح
تبعتر من حواليا
صريع الأفكار التايهه والحلم الكذاب!!!!!
ليه تقفل قدام الحق الباب
مسألتش……؟!
وأنا قلبي كتاب مفتوح لك له ألف جواب
مفهمتش انك مهما تكون من غيري سراب
ليه بتقابل حضني الدافي بطلقة إرهاب؟!
تقتل فيها أخوك من صلبي
تنزع من جوف الحلم وليد
ترضى له الموت؟؟؟!!!!
تخنق فرحة لولاد بالعيد
لوتقدر ....!!
اخنق جوايا الكره المكبوت
دا أنا ياما صبرت عليك
وأنا صبري ما بقى له حدود
يا معاشر إبليس
وتقول لي دي أوامر رب الملكوت
عمر الحق ما كان بالقوة أنت فتوة ؟؟!!
ولا ضميرك مات…..؟؟!!
وأنا اللي فطمتك
ع القرآن والسنة ، وع الإسلام
أنت ضميرك مات …..
أنت ضميرك مات…..
كتبها منال درويش في 10:01 صباحاً ::
