الاسم: منال درويش 
بينى وبينك سد وحيطة بتعلى
وتكبر يوم ورا يوم
تخنق فيا بكرة وامس
ازعق ، اصرخ لجل ما اشوف بعنيه الشمس
تضيع الصرخة فِ توهة وحيرة
ودايرة مريرة ، فى ارض مليها خوف وهموم..
وارجع تانى ادور يمكن القى جوه الدايرة نجوم..
تنور حلمى الضايع منى ،
بس باشوف فِ السكة غيوم
بارجع فاضية واحساس مية !
لا طعم..لاريحة..لا نبض..لا لون!
اكتم همى واخنق المي
تتعذب جوايا النفس
تصرخ ..تبكي ..تقطع قلبي
اضمها حضنى بشوق وبهمس
يمكن ترضى ! جايز تنسى!!
بس بتيجي معايا بالعكس
بينى وبينك سد وحيطة
وبركة غويطة ..تزرع وجعى فترويه يأس
احصد بعد دا كله الام وخطر يدمى جروح النفس ..
بينى وبينك بحر مشاعر
لكن جرحك دايماً واعر
وانا فِ الدايرة باحاول اعافر
بس خلاص الحلم دا راح وبدي ارتاح
من حبك واللي عملته معاك
نفسي اجرب والقالي مهرب
وابعد يمكن اعيش بسماح
واتعلم من درس امبارح ايوه ح اصارح
نفسي يمكن بعد همومى أكيد ح ارتاح
وابعد وابعد ، واطوى جراحي فِ حضنى واسافر ..
جايز تبقى انسان تانى ،مش جارح وعنيد وانانى .
ايوة راح ابعد عنك واهرب ح احضن همي بعيد واسافر ..
ايوة ح اسافر
كفاية تعب وهموم ومخاطر
وانت بحبي تملي تخاطر
ما عملتش للقلب ده خاطر
راح اقولهالك : برافو عليك
تملى بتطلع دايماً شاطر!!!!!
كتبها منال درويش في 12:10 مساءً ::
