الاسم: منال درويش 
جدار بينى وبين بكرة وسد منيع
وتوهة تلف جوايا وقلب يضيع
ونقطة حبرمخنوقة وحلم صريع
فِ لحظة صدق باتأمل كلام في الشعر انا قلته
على بلدي اللي عمري ما ابيع
وياما كتبت فِ هواها كتير مواضيع!!
الف في دايرة طوالي وابكي الناس واحوالى
تنزل دمعتى انهار
اقول يمكن الاقى نهار
يضيع منى الطريق وانهار
ارجع تاني بالمشوار .. عزيمة قلبي مجروحة
ترفرف روحي عايزة تطير ..
تلاقى السكة مدبوحة !!
اخاف منك واخاف ليكِ واخاف فيكِ
تموت الضحكة فِ عنيكِي
واحسك وسط احزانك كسجن كبير
بيقتل فيا بكرة وبعده وامبارح
واحاول انى اتصارح معاكِ وأقول
انا العاشق فِ دنيا هواكِ وانا المقتول
وانا الدايب في اوجاعك وانا المسئول
وبايديا رميت قلبك لاحضان الكلاب والغول
وفجاءة لاقتنى باتفرج،،
كما العاجز ،وحيد مشلول
تحاوطنى عيون الناس واوجاعهم
والف ايدين تبيع فيهم وتوجعهم
ورافضة حتى تسمعهم
تتاجر في الامان و بطيش!!
تخون الملح ويا العيش
وان قلنا الجعان ياكل
يقولوا ما فيش !!
ونهر الخير خلاص راحل
وسايب سكة التايهين
وجاري البحث والتفتيش
عن بكرة اللى ماهواش جاي
عن امبارح اللي ما بقاش ضى
عن الصمت اللي مالهوش زي
يا بلدي يا كل اوجاعى ..
غريبك ياما بتساعى
وابنك تبعديه مشاوير
وح افضل برضه انا العاشق
و مجروح الهوى واسير
مستنى النهار يطلع
مشتاق للامان يرجع
وقلبك مرة لو يسمع
وعينك لحظة لو تدمع
ح اقول لسه بلدنا بخير
ح اقول لسه بلدنا بخير !
كتبها منال درويش في 02:49 مساءً ::
